 O candidato á alcaldía Pedro Pereira presentou ós representantes dos empresarios a proposta do grupo nacionalista para potenciar o sector en Porriño
A candidatura do BNG-Asambleas Abertas reuniuse este venres con representantes dos empresarios dos Polígonos Industriais de A Granxa e As Gándaras. O candidato á alcaldía de Porriño, Pedro Pereira, trasladoulles as propostas do programa nacionalista en materia de industria, que pasan por mellorar os servizos dos polígonos do concello para fomentar o asentamento de novas empresas.
A posta en marcha dun transporte que conecte o centro urbano e o transporte metropolitano coa zona industrial; a creación dunha Mesa Municipal polo Emprego, para abrir un marco de diálogo entre os diferentes actores e promover a xeración de postos de traballo; así como a apertura dunha gardería, que favoreza a conciliación laboral, foron algúns dos temas presentes no encontro.
Os representantes dos empresarios concordaron na necesidade de potenciar estes servizos, e reclamaron un aumento das partidas para a conservación e o mantemento dos polígonos, perante o abandono do actual goberno.
Ademais, o BNG constatou que a privatización dos servizos de lixo e auga están a supoñer unha maior carga para as empresas dos polígonos. Alén de dispararse o prezo, os voceiros dos empresarios criticaron que o servizo non rexistrara ningunha mellora durante os últimos catro anos. Pedro Pereira asegurou, como xa adiantara, que a formación nacionalista traballará para recuperar a xestión pública destes servizos, como medida de aforro e mellora da eficiencia dos mesmos.
O candidato do Bloque propuxo establecer un mellor ordenamento dos polígonos, coa creación de zonas industriais sectoriais, que minimicen o impacto social e dinamicen o sector. Representando aos empresarios estiveron na reunión o presidente da Entidade Urbanística de Conservación do Polígono da Granxa, Indalecio Cuevas, o xerente da mesma, David Sobral, e o presidente da Asociación Empresarial do Polígono das Gándaras, Santiago Gómara. |
