 Entrevista de A Peneira da Louriña ó ex alcalde de Porriño
Raúl Francés, ex alcalde de Porriño. Ven de sufrir unha moción de censura. Quixemos coñecer o seu estado de ánimo. Atopámolo tranquilo e seguro de voltar ó poder nas próximas eleccións municipais. Publicamos aquí a conversa completa mantida con él na redacción de A Peneira da Louriña.
-¿Qué sensación che quedou do teu paso pola Alcaldía do Porriño?
-Experiencia moi grata; aprendín moito e síntome moi honrado de ter sido seis anos e medio alcalde do Porriño.
-¿Cales son os recursos que ten un concello como o do Porriño?
-Ten moitos recursos; o que pasa é que nós atopámonos cunha situación económica que non se correspondía co nivel de ingresos do Concello. Tivemos que sanear as contas o máximo posible e aínda así executamos moitas obras e melloramos a facenda local. Dentro da lei de facendas do Estado, os concellos son a cenicienta da administración, sobreviven ou sobrevivimos como podemos porque o Estado, dentro do seu reparto da tarta de financiamento, así como a tarta competencial permítenos ampliar moita tarta no que é ter cartos para exercer as competencias, desde logo os concellos están afogados totalmente e iso está dicindo neste momento concellos de todos os cores políticos, agora, o Estado sempre foi moi guloso e sempre quixo quedar coa maior parte dos cartos, parece que o Estado só é a Administración Central e o Estado son os concellos, os gobernos autonómicos, a Xunta e o Estado do Goberno Central, pero hai que repartir os cartos.
-¿Qué che quedou ou qué lle queda ó Concello de Porriño sen solucionar dende o punto de vista da entrada de recursos que puidera ter e non ten?
-Ao Concello do Porriño as cousas que lle quedan por solucionar as vamos solucionar nós dentro dun ano, iso que quede claro, nós estamos facendo un punto e seguido, hai un cambio de goberno e nós estamos convencidos de que dentro dun ano e uns meses vai haber novamente un goberno nacionalista no Porriño e sabemos que imos herdar os problemas que xa tivemos cando estivemos gobernando e supoño que algún máis que vai crear este novo goberno. O Concello do Porriño é un concello relativamente rico a nivel de recursos, ten moitas posibilidades de ter unhas arcas saneadas, pero houbo unha política suicida do Partido Popular onde os servizos non se pagan, se prestan mal, os servizos do auga, do saneamento, da limpeza…, eran servizos moi malos, dábase moi mal servizo aos veciños pero tiñan a cousa de que non se cobraban. Eu creo que o Porriño neste momento o que ten que facer é sanear as súas arcas e que cada quen pague segundo as súas posibilidades e sobre todo conseguir que se faga unha cuestión que é moi importante, que non tiveron o valor para levar adiante os grupos que agora están gobernando, que é poñer en regra todo o tema dos polígonos industriais, que por se alguén non o sabe, a maior parte deles están na categoría de solo rústico de cara ao catastro, ou sexa, están aínda como se foran solo rústico, non como industriais; iso quere dicir que hai unha mingua de ingresos para o concello grandísima.
-¿Cal é a porcentaxe de ingresos que supón nos orzamentos do Concello os dous polígonos? Dise que o Porriño é un monstro industrial, ¿iso que significa nos ingresos?
-Neste momento non podo dicir as porcentaxes, se queredes volas busco e vos digo. Pero o que é a industria no Porriño non estaba pagando o que ten que pagar, é máis, neste momento ou polo menos cando eu estiven gobernando, houbo moitas presións por parte do empresariado reclamando que o Concello fixera melloras nos polígonos, que atendera os polígonos…, nós mantivémonos firmes, dixémoslle ao empresariado que como ocorre noutros parques empresariais do Estado había que facer unhas unidades de conservación onde os empresarios pagaran unha parte e o Concello pagara outra; eles sempre se negaban e toda a conservación a está a facer o Concello. O que fixemos foi manter unha conversación digna pero explicándolles que non podiamos ir a grandes cuestións. Neste momento, eu lin o outro día que houbo unha reunión do empresariado, dos representantes dos empresarios co novo goberno e que xa amablemente o novo goberno dixo que ía encargarse de todo. Eu creo que é un mal camiño, o que hai é que compartir os gastos, os empresarios teñen que saber que están no Porriño, un sitio envexable a nivel empresarial, nun asentamento de luxo e os asentamentos de luxo son como todo, cando un vive nun chalé paga por un chalé e cando vive nunha chabola, se paga, non debería pagar.
-O tema dos graniteiros segue pendente…
-Segue pendente e é un tema que a dereita utilizou moito, eu creo que como escusa, sempre que había problemas ou viñan as eleccións, a dereita dicía “temos aí as canteiras e estes non pagan..”, iso non é así, é falso; as canteiras, cando nós entramos estaban todas sen licenza de actividade. Había unha lei de minería imposible de cumprir por parte das canteiras e despois había unhas débedas históricas co Concello que foron a causa de non ter feito as medicións e non ter pasado o que eran os recibos mensuais aos canteiros, así que había un problema de ocupación que solucionar. Nós en vez de embarullar todo o tema, o que fixemos foi separalo en tres partes, primeiro o tema da legalización, o BNG no Porriño traballou arreo nese tema, traballou arreo co grupo parlamentario do Bloque Nacionalista Galego e que consigue industria que estaba en mans do compañeiro Blanco do BNG, e abriuse por primeira vez un proceso claro dunha nova lei de minoría onde as canteiras do Porriño son perfectamente legalizables. Unha vez que hai legalización, nós podemos poñer en claro todo o tema das ocupacións. Hai que marcar cal é o territorio ocupado, a que empresas se lle arrenda e que licenza ten detrás para arrendalo…
Como a maior parte das canteiras de Galicia, as canteiras do Porriño non teñen licenza de actividade, teñen unhas licenzas de obra, licenzas do plan de explotación anual, pero o que é licenza de actividade como ten calquera comercio, calquera industria que ten o seu cartón que di licenza de actividade concedida tal día pola Xunta de Goberno Local ou pola Alcaldía, polo que sexa…, iso non o teñen. Digamos que non son ilegais pero están nunha alegalidade. A nova lei de minería corrixe iso nunha transitoria que ten o final da lei e di que as canteiras están dentro dun solo rústico como son as do Porriño e van pasar a ser legalizadas a través da Xunta de Galicia, cuestión que nós cremos que é importantísima; no momento que estean legalizadas é unha cousa boa para a industria e ademais é unha cousa boa tamén para a administración, para controlar que esa actividade se desenvolve correctamente. Que ten o Concello do Porriño coas canteiras?, pois ten un canón de explotación que é un canón que nós quixemos pasar a un canón de arrendamento que é o que a lei contempla para estes casos e presentamos un ano despois de estar no goberno unha proposta ao pleno e o pleno rexeito esa proposta, votou en contra o partido Popular, votaron en contra os Independentes, daquela Ciudadanos non existía pero estaban dentro dos independentes e votaron en contra, e votou tamén en contra o Partido Socialista, e aí malogrouse o conseguir a solución de ter un arrendamento claro cuns metros claros, uns canóns claros e sobre todo saber que tipo de relación tiña o Concello coas canteiras. O Concello ten uns terreos e os arrenda, iso é o que hai, pois aí malogrouse. De tódolos xeitos, nós sabiamos que había outro proceso aberto que era o proceso xeral de legalización pero a moción de censura colleunos no tramo final deste proceso; fai un par de meses empezáronse a legalizar canteiras da lousa na zona do Barco e nós cremos que as canteiras do Porriño en calquera momento poden ser legalizadas por parte da Xunta porque ten todos os papeis alí. Feito isto, o que hai que ver é canto quere o Porriño cobrarlles aos arrendatarios por esa ocupación do terreo e canto entra dentro do razoable que se cobre. O canón que hai instaurado nós cremos que é revisable, de feito na proposta que nós faciamos revisábase á alza o que tiñan que pagar pero tampouco imos falar de cantidades multiplicadas por dous ou por tres, ten que haber unha subida e sobre todo ten que haber un asunto que non hai neste momento que é que se unha canteira non paga… que fai o Concello? Neste momento hai unha indefensión do Concello respecto daqueles que non pagaron e hai canteiras que non pagan e a min preocúpame que o primeiro que dixo o novo alcalde é que el entendía o daqueles canteiros que non pagan, porque había crise, etc. Eu doulle a volta a esas declaracións del, eu quero que entenda os canteiros que si estiveron pagando. Os canteiros que si foron pagando e están ao día, que son unha boa parte das canteiras, a maior parte delas, a esa xente hai que explicarlles que estiveron facendo ben, que seguiremos cobrando e aqueles que no pagan o Concello vai a actuar sobre eles, de feito no último ano eu mandei varias cartas a distintos canteiros esixíndolles o pago e incluso con algúns chegando a fórmulas de pago aprazado. O Alcalde novo di que non lle treme o pulso, a min dáme a impresión de que non lle treme cos débiles pero lle vai tremer moitísimo diante dos fortes.
-Ante dicías que dentro dun ano, máis ou menos, os nacionalistas van volver gobernar, estás pensando en gobernar en maioría ou coa axuda do PSOE?
-Nós estamos pensando en gobernar, en maioría debe ser magnífico gobernar. Neste momento a forza política que a xente ve con capacidade de goberno, con capacidade de xestión e con seriedade suficiente é o BNG. Entón se nos queren poñer con maioría absoluta pois estupendo e se non en minoría ou con pactos imos entrar no goberno, iso está claro.
-Como son as relaciones, agora que estades fóra do goberno, entre o Bloque e o PSOE?
-Son semellantes ás que hai en todo o país. Son unhas relacións de certa proximidade e ao mesmo tempo de certo coflito porque estamos disputando electorado parecido, hai xente que vota nunhas eleccións ao Bloque e noutras vota ao PSOE e que do PSOE se pasa ao Bloque, entón ao compartir electorado sempre hai unhas relacións tirantes para que non se che leven os votos.
-Non habería ningún problema para formar un novo goberno aínda coas diferencias que cada partido ten?
-Nin tampouco o habería neste momento, nestes dous últimos anos e medio. O único problema que había era que ese goberno non daba a maioría, e cando un pacto non dá a maioría un ten que saber o que está negociando, porque se negocias con alguén que che di temos a maioría para que no pleno se poda aprobar todo o proxecto que se leva adiante é unha cousa, e se di temos un pacto con outra forza política pero seguimos sendo minoritarios no pleno pois…, a valoración é distinta. Entón o Bloque e o PSOE tiveron as súas negociacións, eu non participei nelas, foron negociacións a nivel de executivas das dúas forzas políticas e non se chegou a un acordo, digamos que eles querían unha cousa e o Bloque non estaba disposto a dála, nese caso, durante ese tempo, o PSOE estivo na oposición e nós estivemos no goberno.
-Ti cres que o novo goberno do tripartito se vai consolidar, vai presentarse nas próximas eleccións como unha forza única? Como ves o agrupamento deses tres partidos?
-Eu non creo que deba facer de futurólogo, iso é un problema que teñen eles e que o resolvan que eu non estou dentro dese problema. O que si podo facer é unha análise do que eu vou vendo neste mes de inicio de goberno. Neste mes de goberno hai unha asimilación entre os tres grupos, digamos por eliminación. Levamos un mes de goberno e todos saben no Porriño que manda Nelson e se Nelson non está con quen hai que falar é con Jacobo, o segundo de CxP. O PP está totalmente anulado e os Independentes coa saída de Gonzalo quedaron descabezados. A min chámame moito a atención que nun pacto entre tres partidos se deixara tomar as rendas completas do Concello a un deles, que tampouco era o máis votado. Ante iso, eu penso que Nelson está actuando ben e que os demais ou non se enteran moito ou digamos que lle comeron todo o espazo.
-Cando dis que o Señor Santos está actuando ben, a que te refires?
-Pois que o que tiña que facer ao entrar no goberno era anular os outros dous competidores que ten dentro do goberno, entón iso o esta a conseguir perfectamente, os outros son meras comparsas da política da Alcaldía. Nelson estase vendendo como un alcalde de man dura, como a un alcalde que non lle treme o pulso e está volvendo a unha imaxe de alcalde que nós xa tiñamos, nós xa sufrimos esa imaxe do alcalde, Nelson quere ser Barros e quere mandar como mandaba Barros; digamos que o Parido Popular e o que queda dos Independentes, supoño que tamén quererían ser eles Barros, pero están nun sentido no que o que ten que ser Barros é Nelson.
-As declaracións de Nelson dicindo que estaba máis ou menos claro quen sería o cabeza de lista das próximas eleccións co PP reagrupado, ti cres que iso ten viabilidade?
-Eu creo que si, porque a min estráñame que o PP, a un ano das eleccións, quite a un alcalde para poñer outro e que despois dentro dun ano teña que dicir que non é o seu candidato á Alcaldía. Se o PP aparece dentro dun ano dicindo que Nelson non é o candidato á Alcaldía, habería que sumalo aos moitos erros que tiveron na política porriñesa. Eu o que barallo é que Nelson é o home forte do PP, estea dentro do PP ou non, os demais quedaron anulados. E como dicía, estase intentando ir ao modelo dun alcalde que toma todas as decisións, iso pasaba con Barros, vimos a onde nos levou, levounos a un Porriño en caída libre, totalmente paralizado, cunhas relacións coa veciñanza sempre de tensión, de autoritarismo… Vivimos seis anos e medio dun modelo de alcaldía completamente diferente, un modelo de alcaldía que delega nos seus compañeiros e compañeiras e a acción de goberno. O Porriño dende que nós entramos empezou a transformarse, a crecer, a converterse nun pobo habitable, e agora estes queren volver á situación anterior.
-O BNG, coa experiencia que tivo durante os anos de goberno, repetiría candidatura nas próximas eleccións, ou cres que necesita unha remodelación con novas caras?
-Eu creo que quen se vai presentar é o BNG, para ben e para mal. Quen se presentou no 2003 foi o BNG, quen se presentou no 2007 foi o BNG e quen se vai presentar no 2011 vai ser o BNG. Quen sexan as caras da candidatura a min preocúpame menos, preocúpame saber que o BNG ten un proxecto para o Porriño e que se vai presentar e que a xente vai poder votar a favor dese proxecto.
-Raúl Francés non se postula número un da próxima candidatura?
-Raúl Francés neste momento non se postula a nada. Está na vida normal como concelleiro da oposición, co seu traballo, coas súas afeccións, cos seus intereses… Vou seguir traballando arreo, teño un compromiso cos meus conveciños de estar activo en política nesta lexislatura porque xa me presentei nas eleccións e eu farei todo aquilo que sexa bo para o BNG.
-Cal e a túa actitude, fronte do teu grupo, agora mesmo na oposición? Que cres que che falta por facer ou que vas facer? Que plan tendes, dar caña, deixar gobernar…?
-Eu creo que non hai que volverse tolo con esta situación. Nós estivemos na oposición e estivemos no goberno, entón estar na oposición é unha cuestión normal e estar no goberno tamén é unha cuestión normal, ou sexa, o BNG nesa cuestión non se vai volver tolo, de se hai que dar máis caña ou non. Nós temos un proxecto claro para o Porriño, a xente mirou que proxecto era e ese proxecto fíxose en contra dos grupos que querían volver ao pasado, que agora están gobernando; fíxose en contra da Deputación, que estivo en contra nosa durante seis anos e medio sen soltar nin un real e ademais intentando facernos a vida imposible; e fíxose cun goberno da Xunta no que estaba Fraga, cun goberno da Xunta no que estaba Touriño máis Quintana, e agora cun goberno da Xunta no que está Feijóo; así que digamos que convivimos pouco, estivemos once meses. Eu creo que a dereita sempre sentiu como unha ferida que non podía soportar perder a Alcaldía do Porriño, esa é unha cuestión que os pon dos nervios, pero para iso non teño cura.
-Díxose moito que o cambio na alcaldía de Porriño, que máis que dos tres grupos que ao final foron os protagonistas, había un mullidor por detrás que era Louzán. ¿Por que cres que Louzán tivo ese interese? ¿Tanta sede dese novo deputado que hai no Baixo Miño?
-Cando eu empecei a dicir que detrás de iso estaba Louzán, había xente que non o cría. Neste momento creo que o 99% da xente sabe que o que fixo a moción de censura do Porriño foi Louzán. Louzán ten algún interese porque os porriñeses ou porriñesas teñan mellor vida ou non? Supoño que o interese que pode ter un do Porriño sobre a vida dos de Ribadumia, que é de onde el é concelleiro. Todos estamos interesados en que os concellos progresen pero eu creo que Louzán non ten un proxecto para o Porriño. Entón el fíxoo por outros intereses que non eran eses, o interese del é seguir de presidente da Deputación. Para seguir de presidente da Deputación interésalle meter cantos máis votos poida debaixo do paraugas do PP dentro do partido xudicial de Tui. Porque o partido xudicial de Tui neste momento ten dous deputados na Deputación e no 2011 vai ter tres, e Louzán ten os deputados xustos para ser presidente. Ese deputado a máis de Tui vai ser incluído na Deputación, entón Louzán esta intentando garantir os seus garavanzos, el quere seguir sendo presidente da Deputación, o tema do Porriño?, home, preocúpalle o goberno do BNG porque xa demostrou que a el o BNG é unha cousa que o pon dos nervios e non quere colaborar co BNG nun goberno, intenta facerlle a vida imposible alá onde estea, sexa no Porriño, en Salceda, Tomiño, en Bueu, en Pontevedra…, onde sexa, e o único que quere garantir é o sillón de presidente da Deputación. Eu creo que é unha xogada desesperada final e vai perder as dúas cousas, vai perder o goberno do Porriño e vai perder a Deputación.
-Sr. ex alcalde, un mes de goberno novo en Porriño, ¿qué opina del?
-Eu creo que é un goberno débil, que non sabe gobernar, non ten proxecto de goberno e que está cunhas actitudes autoritarias que non son de recibo. Ademais, está facendo bastante o ridículo. Pásome a explicar; a presentación da moción de censura pola notaría foi un tema esperpéntico, ríronse de nós e todos aqueles fóra de Galicia que se decataron tamén se riron de nós, un desastre… A lei marca claramente como hai que facer as cousas e non fixeron nada do que marca a lei. Este goberno parece que está tendo problemas legais, parece que as leis as temos que cumprir os veciños e as veciñas pero o goberno está por enriba da lei, e iso non llo imos consentir dende o BNG, iso que o teñan claro; iso xa o tivemos moitos anos, o de estar por enriba da lei o alcalde e o goberno xa pasou moitos anos; pero agora xa se sabe que se pode gobernar e estar dentro da lei como estivemos nós. Entón non lle imos consentir que estean fóra da lei. A lei de patrimonio a descoñecen, a ignoran ou o que é peor pensan que é unha lei que é mala e que hai que saltala. O que fixeron na Fonte do Cristo é de xulgado de garda, nós presentamos unha denuncia en Patrimonio cando estaban as vallas rodeando a Fonte do Cristo e estaban os traballadores facendo o que estaban facendo, e xa llo fixemos saber a Patrimonio, e estamos esperando que Patrimonio abra un expediente e que actúe, non se pode actuar sobre un ben de interese patrimonial do Porriño, a máis un ben do insigne Antonio Palacios, e chegar así sen máis cunhas máquinas de auga a presión, con líquidos abrasivos e tocando nos dragóns como se aquilo fora o chalé dun novo rico que agora decide que lle cambien as tellas. Na cuestión dos plenos, pois decidiron facer menos plenos, cando había un pleno cada mes eles deciden facelo cada dous meses, por que? porque teñen medo porque a eles a lei non lles gusta, o que é a participación a eles non lles gusta. Despois, están tendo reunións con distintos colectivos veciñais e nestas reunións están dando unha impresión penosa; unha anécdota podo contar que é xeneralizable: o outro día nunha reunión coas APAS, o alcalde non estaba, estiveron esperando que viñera o alcalde, porque estaría ocupado, e eu entendo perfectamente que puidera estar ocupado pero no é o que me interesa; chega e lles pregunta aos das APAS “¿ustedes qué quieren? Pidan lo que quieran que se lo vamos a hacer todo“, paréceme unha cuestión bastante insultante, a xente que estaba alí xa dixo “bueno, que pasa aquí! é a carta aos Reis Magos?”, e inmediatamente diríxese á Concelleira de Educación e dille “Cales son as nosas competencias no tema educativo?”, home, o primeiro que tes que facer é enterarte de cales son as competencias do Concello en materia educativa, e despois dicir, dentro das competencias educativas que eu teño comprométome a facer isto e isto, e con estes cartos e neste tempo. Ou sexa, é un desastre, non se pode presentar nunha reunión nese plan. Están descubrindo o Concello, eles non tiñan nin idea do que había; sitio que van, sitio que demostran que non tiñan nin idea; o outro día estiveron no Aimen, o Aimen pediu para facer unha ampliación, é un centro tecnolóxico; nós defendemos dende o BNG a importancia de potenciar os centros tecnolóxicos nun enclave industrial como somos nós, o do automóbil, o do Aimen ligado ao sector do metal, están facendo un proxecto de soldadura láser moi interesante que ademais está dando moi bo resultado, hai un proxecto de formación dentro dese centro tecnolóxico importantísimo, e o outro centro tecnolóxico que é o da pedra. Nós cremos que iso é fundamental para O Porriño, así o dixemos mentres estivemos gobernando e que por iso nós estabamos dispostos a partirnos a cara con que fora, por defender que Porriño ademais de ter industria tivera centros de investigación relacionados con esa industria. Pois do Aimen, o Alcalde que está gobernando e o seu segundo, o Sr. Jacobo, dixeron de todo menos que era bonito, practicamente os acusaron de todo, unhas cousas desesperadas… Pois xa non é un perigo que o Aimen estivera no Porriño, o puxeron en perigo; por certo, con todos os apoios de todos os grupos do noso BNG, e agora sae no Faro descubrindo que o Aimen é un centro de formación e di que hai que potencialo; pero se estiveron falando do Aimen e non o coñecían, estiveron falando do centro tecnolóxico do granito e non o coñecían, estiveron falando da política do emprego e non coñecían o que había montado no Concello, ou o que o propio Concello tiña montado para formación e busca de emprego para os traballadores e traballadoras. Eles estiveron seis anos e medio vivindo de gorra, cobrando por ir aos plenos, cobrando por ser grupo político e vivindo de gorra; ademais contanto mentiras do goberno, e agora para a súa desgracia están no goberno e teñen que recoñecer que non sabían absolutamente nada, que son unhas persoas que entran aí en primeiro de parvulitos cando eles dicían que viñan coas carreiras acabadas, e iso para o Porriño é moi perigoso. Entón, no tema das canteiras non teñen nin idea, no tema do desenvolvemento industrial non teñen nin idea, no tema dos polígonos industrias non teñen nin idea, no tema do patrimonio non teñen nin idea, no tema de cultura meteron a pata ao principio crendo que ía ser dicir “aquí estamos nosotros y lo de la cultura es cosa del Bloque, aquí lo anulamos...” e tiveron unha contestación veciñal bastante elevada, co tema de Cans, co tema da Escola de Teatro…, e tiveron que recuar, pero o que están demostrando é que son unha xente que non teñen ni proxecto e pasaron seis anos e medio de guasa. E outra cousa que fixeron é levantar calumnias sobre o Concello, non sobre o BNG, senón levantar calumnias sobre o Concello. O Sr. Nelson Santos di que o Concello ten unha débeda de 20 millóns de euros ou máis segundo el, agora el é o Alcalde, ten todas as armas no seu poder para ensinarlle á cidadanía esa débeda, onde está e que son 20 millóns de euros, eu digo que minte, eu lle digo que está mentindo con todas as letras, mentiu para chegar ao goberno. Un concello que ten que estar contratando a distintos provedores, un provedor vai atender mellor ou peor se ve que é un concello saneado, pero se é un concello que din ten unha débeda de 20 millóns de euros…; pois é mentira que o Concello teña unha débeda de 20 millóns de euros. Agora ten a posibilidade de pór enriba da mesa e dicir aquí están eses 20 millóns e o culpable é o Sr. Raúl Francés; ten todos os recursos, ten os servizos de intervención, o programa contable do Concello, os servizos de tesourería…, e nós queremos que ensine á cidadanía onde están eses 20 millóns de euros. Dixeron que o goberno se gobernaba con dúas persoas, dixérono no debate dos orzamentos que se aprobaron por cuestión de confianza no 2008, dixeron que no Concello tiña que haber dúas dedicacións exclusivas, que con iso chegaba; chegaron e puxéronse oito, de dous pasaron a oito; contrataron como asesor e persoal de plena confianza a persoa que estivo rebentando os plenos durante estes seis anos, que ten nome e apelidos, chámase Urbano, e que é o cuñado de Nelson, durante seis anos e medio estivo rebentando os plenos, presentando alegacións a todo aquilo que se movía no Concello para paralizar e hai non moito presentou un escrito no Concello por unhas alegacións onde lle chamaba de todo menos bonito a Gonzalo Ordóñez, o Partido Popular e a todos os seus membros. Ese señor está neste momento cobrando do Concello, o seu premio foi poñelo a soldo; se o Partido Popular e os Independientes despois desta traxectoria consenten que ese señor estea a soldo do Concello do Porriño teño eu razón, non pintan nada, son uns don ninguén, quedaron anulados. Entón, agora é o momento de explicar esas cousas; este goberno nos vai saír máis caro, é un goberno que sabe menos, un goberno de ordeno e mando que dialoga menos e é un goberno que non sabe o que quere facer. Menudo cambio demos no Porriño, ¿non?
-¿O tren vai atropellar os do Porriño ou non?
-O tema do tren demostra como é este novo alcalde. Hai dúas posicións respecto do tren: a posición que ten o Partido Socialista que a presentou no ano 2007 en plenas eleccións, nós acusámolos de facer electoralismo cun tema de suma importancia para o Porriño, pero teñen a súa posición que é unha posición que respalda o Ministerio de Fomento; e ata o de agora había unha maioría no pleno na que estaba o BNG e os demais grupos que diciamos dúas cousas, unha que o Ministerio de Fomento debía vir ao Porriño e explicarnos a todos que era o que quería facer, e dúas, que nos dera prazos de execución para o paso a nivel. De repente veu o Ministerio, non se reuniu co pleno, reuniuse co Alcalde e despois invitado polo PSOE coa plataforma contra o tren, o BNG non se lle chamou para ningunha reunión e de repente, o Alcalde que dicía que estaba en contra totalmente da solución que Fomento lle daba, pasa a dicir que está totalmente de acordo, por que? Por que está de acordo? Que é o que lle interesa? El que estivo buscando activamente, porque nós como estabamos no goberno tivemos que ser un pouco cautos, sempre fomos cautos nesas cuestións, pero eles xa estiveron recollendo alegacións e alimentando alegacións en todo Torneiros contra esta solución, que agora din é a mellor do mundo e iso que xa non hai dous anos, e sen explicar nada cambian de posición. O BNG vai seguir mantendo unha posición sobre o tren, nós chamamos as forzas políticas a un consenso, a discutir cal é a solución que a nós nos parece mellor, a todo o Porriño lle parece mellor trasladarlle ao Ministerio unha posición conxunta. Se se sigue actuando deste xeito, como se esta actuando agora, cada un polo seu lado, o Partido Socialista por un lado, o alcalde por outro que non se sabe moi ben cal é ese outro, o BNG presentará a súa solución sobre o tren e intentará consensuala cos veciños, pero aquí é un dos sitios onde se demostra, primeiro os descoñecemento total que esta xente tiña do que estaba pasando no Porriño, ou sexa, o vagos que foron durante seis anos e medios, e segunda cuestión, que aquel que di que non lle treme o pulso hai que ter coidado con el, porque non lle treme o pulso cos débiles pero en seguida baixa os pantalóns diante dos poderosos, e iso é o que está pasando, o Sr. Nelson decidiu baixar os pantalóns para conseguir unha soa cousa, que é un titular que di que se vai eliminar o paso a nivel do Porriño, ese titular xa o tivo Barros, xa o tiven eu, xa o tivo o PSOE; por un titular un non se debe vender así tan alegremente. É sorprendente, e ademais ofensivo, que o Porriño estivera esperando cincuenta anos porque se nos quitara o paso a nivel e que cando chegue o momento o Ministerio de Fomento se reúna co Alcalde de Vigo primeiro en comisión pechada e despois se reúna cos pobres alcaldes da circunvalación; ao alcalde de Vigo lle enterre todo o tren por todo o territorio e aos outros lle diga que non teñen nin un duro para facer ningunha modificación e que estes alcaldes, que son os alcaldes representantes dos veciños aplaudan coas orellas, iso non é de recibo. Fomento ten que dar unha boa solución ao Porriño. Nós estamos dispostos a colaborar e buscar unha solución boa para todos, pero ao que non estamos dispostos é a que veñan tomarnos o pelo, e non estamos dispostos a vendernos por catro duros. O tema de ir aos pobres negritos coas contas de vidro para levar o ouro e deixarlles alí os cachibaches acabouse, con nós non van xogar. Entón nós cremos que hai unha posición forte, que é a posición do Partido Socialista, a respectamos, non a compartimos pero a respectamos, e despois o que hai é un goberno municipal que baixa os pantalóns por saír na foto con quen sexa. Ou sexa que temos un goberno moi débil que o Porriño non merece.
Política galega
-Pasemos agora a outro campo político do BNG. Este días estase falando dunha asemblea que Irmandiños presentou para convocar e tratar de aclarar un pouco a figura representativa do BNG de cara ás eleccións autonómicas. Ti que estás en MáisBNG, como ves o tema? Cres que é conveniente ese novo cambio agora ou deberan pasar as eleccións municipais?
-Eu no BNG son un militante de base total, non teño ningún cargo institucional nin político, nin no consello local, ni no consello comarcal, ni no consello nacional; tamén é certo que tampouco me presentei para telos, eu estaba de alcalde e con iso tiña suficiente ocupación como para estar noutros cargos. O BNG creo que o positivo que ten é ter un bo resultado nas eleccións locais do 2011 e ter un bo resultado no 2013 que nos leve ao goberno da Xunta. O BNG ten uns órganos de decisión que son a executiva e o consello nacional e creo que en todas esas cuestións é onde se van discutir. O que decidan eses compañeiros e compañeiras que teñen esa responsabilidade, nós, os demais temos que apoialo, temos que apoiar esas decisións.
-Ti como un membro destacado, porque non es un simple militante de base aínda que organicamente sexa así, fuches alcalde durante seis anos e polo tanto tiveches unha responsabilidade política dentro do partido. Se agora tiveras que votar asemblea decisiva antes das municipais para nomear a persoa que vai ser cabeza de lista nas autonómicas ou non, ¿que votarías? ¿A favor ou en contra?
-Eu pódoche dicir o que votei na anterior asemblea nacional, eu votei por unha candidatura que ía encabezada por Carlos Aymerich, a candidatura que máis votos tivo foi a encabezada por Guillerme Vázquez, despois estivo a de Carlos Aymerich que foi unha sorpresa dentro da asemblea nacional a cantidade de apoios que tivo esa candidatura, que foi unha candidatura que digamos non tivo moito percorrido anterior como para obter ese resultado; a xente desconfiaba de se podía ser unha candidatura frouxa e foi unha candidatura que sacou moitos votos na asemblea nacional, eu foi pola que votei, e despois hai unha candidatura que foi a encabezada por Beiras, do Encontro Irmandiño, que digamos sacou unha porcentaxe razoable e digna de votos. A partir desa asemblea nacional, eu penso que a lectura está ben clara, non hai unha forza dentro do BNG que teña unha hexemonía total e o que hai que facer é entenderse. Non é unha cuestión de negociar ti o que me das e eu o que che dou, eu creo que todos temos claro que o BNG ten que se presentar forte ás eleccións do 2011 e do 2013. Neste momento temos un portavoz nacional que é Guillerme que, unha vez que anunciei o que estou dicindo, que non votei por el como portavoz nacional, da dereito a dicir que está facendo un labor de concello nacional digno, iso que quere dicir? que Guillerme Vázquez é o portavoz nacional da xente que o votou e da xente que non o votou e eu téñolle o respecto e a fidelidade total como voceiro nacional. Se alguén estas cuestións as entende como que eu votei por unha lista e entón non podo apoiar o proxecto do goberno do BNG está confundido. Eu penso que MáisBNG niso está demostrando moi claramente que somos unha alternativa dentro do BNG consciente e responsable e que imos a favor do BNG, que é o que sempre defendemos, e creo que as outras candidaturas, mentres non demostren o contrario teñen as mesmas calidades, tanto o Encontro Irmandiño como a candidatura da APU son tamén candidaturas que están a favor do BNG e da forza nacional. Chegado o momento de tomar decisións de se se debe facer a Asemblea Nacional antes ou despois…, para que temos un consello nacional? para que se debata e se vote con toda a liberdade do mundo.
-Falando de gobernos, define a Feijóo e o seu goberno neste último ano.
-Cunha palabra: demolición, o único que fixeron dende que chegaron foi desmontar cousas, montar non montaron ningunha. Ata agora ao único que se dedicaron este ano foi a tombar o acordo que había sobre o galego, a tombar a política de benestar social que se estaba facendo, a tombar o plan eólico, a tombar o que se estaba facendo no medio rural; cultura xa é un desastre, pasamos de ter unha Consellaría de Cultura a non ter absolutamente nada e ter unha persoa que navega nos seus mares que só el coñece. Ou sexa, este é un goberno de demolición e non de construción, desafortunadamente un goberno de demolición nun dos peores momentos que está pasando Galicia, por dúas circunstancias, unha pola crise económica mundial que nos está a pegar durísimo e nos vai seguir pegando durísimo, e dúas pola intención que hai nos partidos estatais, o PP e máis o PSOE de anular os dereitos nacionais que temos como galegos. Se dentro desas dúas cuestións tan graves, temos un Presidente do Goberno como o Sr. Feijóo, pois a min preocúpame moito.
-Caixas galegas si, caixas galegas non, fusión si, fusión non…
-Eu creo que o aforro galego débese investir en Galicia e estar controlado dende Galicia. O BNG tense mostrado a favor da fusión das caixas, e eu entendo que se o BNG se mostrou a favor da fusión das caixas, e o que esta levando a dirección do BNG ten os datos suficientes como para entender que iso é o máis razoable. Eu penso que o BNG aquí fixo unha política moi interesante de alertar os galego e galegas de que podía haber manobras que levaran os seus aforros fóra e no tema de se iso pasa por unha fusión e que termos debe ter esa fusión, creo que é unha cuestión que hai que deixarlle máis xa aos entendidos e aos que teñen os datos na man, eu non os teño, entón o que si vexo é que hai un interese moi claro de Esperanza Aguirre e o Partido Popular de meter a man en Galicia, hai un interese clarísimo de meter a man nas nosas caixas, e hai un interese do Partido Socialista de quitarlle o poder ás autonomías respecto do sistema financeiro. Eu creo que o BNG o está denunciando e penso que a solución pasa porque os gobernos das distintas autonomías ou nas distintas nacións do estado teñan control público e parlamentar sobre a actividade do aforro, das caixas; non vexo a Caixanova investindo na costa de Levante ou a Caixa Galicia arriscando os cartos dos galegos na costa do Levante, se teñen que arriscar nalgún sitio é en Galicia, entón eu digo que se controle iso. Que debe ser unha caixa unida ou non unida…, eu de economía pouco estudei. |
